6 ნოემბერს ქ. რუსთავში დავით ტვილდიანის სამედიცინო უნივერსიტეტის ახალი საუნივერსიტეტო კამპუსი გაიხსნა. კამპუსის გახსნას ესწრებოდნენ საქართველოს პრემიერ მინისტრი ბნ. გიორგი კვირიკაშვილი, განათლების მინისტრი ბნ. ალექსანდრე ჯეჯელავა და სხვა მნიშვნელოვანი პირები.
დავით ტვილდიანის სამედიცინო უნივერსიტეტის ახალი საუნივერსიტეტო კამპუსი ამ ეტაპისთვის მხოლოდ უცხოელი სტუდენტების მიღებას გეგმავს. სამომავლოდ კი კამპუსში ქართველი სტუდენტებიც შეძლებენ სწავლასა და ცხოვრებას. ახალი კამპუსის ტერიტორიაზე ასევე იგეგმება დავით ტვილდიანის საზოგადოებრივი საექთნო კოლეჯის ფილიალის გახსნაც.
ახალი საუნივერსიტეტო კამპუსის გახსნის ცერემონიალზე სიტყვით გამოვიდნენ: საქართველოს პრემიერ მინისტრი ბნ. გიორგი კვირიკაშვილი, საქართველოს განათლების მინისტრი ბნ. ალექსანდრე ჯეჯელავა, დავით ტვილდიანის სამედიცინო უნივერსიტეტის კურსდამთავრებული, პარლამენტარი მარიამ ჯაში და დავით ტვილდიანის სამედიცინო უნივერსიტეტის პრეზიდენტი ბნ. დიმიტრი ტვილდიანი. ბნ-მა დიმიტრიმ გამოსვლის შემდგომ სიტყვა გადასცა უნივერსიტეტის კურსდამთავრებულს მარიამ წიქვაძეს და უნივერსიტეტის მე-5 კურსის სტუდენტ ბაბა საი კრიშნა ამბედქარს. სტუდენტებმა დამსწრე საზოგადოებას უნივერსიტეტში მიღებული გამოცდილება და ემოციები გაუზიარეს.
გახსნის ცერემონიალზე დავით ტვილდიანის სამედიცინო უნივერსიტეტის რექტორმა ბნ-მა ლევან ტვილდიანმა დავით ტვილდიანის სახელობის სტიპენდიით დააჯილდოვა სტუდენტები:
II კურსი - მარიამ მეფისწვერიძე
III კურსი - ავთანდილ ქოჩიაშვილი
IV კურსი - თამარ რატიშვილი
V კურსი - ნინო ღუდუშაური
VI კურსი - მარინე ისაკაძე
ტრადიციისამებრ დავით ტვილდიანის სამედიცინო უნივერსიტეტის ერთგულმა პარტნიორმა სამედიცინო ცენტრმა „მედი-ქლაბ ჯორჯიამ“ გამოავლინა რჩეული სტუდენტი, რომელიც წელს უკვე მეორედ გახდა DTMU-ს მე-5 კურსის სტუდენტი ალექსანდრე ასათიანი. რჩეული სტუდენტი ცენტრის დირექტორმა ბნ-მა გიორგი გოცაძემ სტიპენდიით დააჯილდოვა.
სტიპენდიანტების დაჯილდოვების შემდეგ უნივერსიტეტის დეკანმა ტრადიციისამებრ მესამე კურსის სტუდენტებს თეთრი ხალათები გადასცა, რაც სწავლების კლინიკურ ნაწილზე გადასვლის სიმბოლოა. უკვე მეორე წელია თეთრი ხალათების ცერემონიალს თან ერთვის სპეციალურად ამ დღისთვის შექმნილ ნახატზე ანაბეჭდების დატოვების ტრადიცია.
გახსნის ცერემონიალი თბილისის Big Band-ის კონცერტით დასრულდა.