პირველად საქართველოში დავით ტვილდიანის სამედიცინო უნივერსიტეტში სტუდენტთა ორგანიზებით დაარსდა ქირურგიის ინტერესთა ჯგუფი (SIGA) . 23 აპრილს უნივერსიტეტში ჩატარდა აღნიშნული ჯგუფის პირველი ვორქშოპი, რომელიც 5 საათი გრძელდებოდა და თეორიულ და პრაქტიკულ ნაწილებს მოიცავდა. აღნიშნულ ვორქშოპს 55 სტუდენტი ესწრებოდა.
SIGA არის დავით ტვილდიანის სამედიცინო უნივერსიტეტის სტუდენტთა მიერ დაარსებული ორგანიზაცია. მისი მთავარი მიზანია სტუდენტებს გაუღრმავოს თეორიული და პრაქტიკული ცოდნა ქირურგიული პროცედურებისა და ტექნიკის მიმართულებით და ჩამოუყალიბოს სპეციფიკური უნარ-ჩვევები, რათა მათ შეძლონ კარიერული მოღვაწეობა გააგრძელონ ამ განხრით.
ასოციაცია SIGA-ს პირველი ვორქშოპი დავით ტვილდიანის სამედიცინო უნივერსიტეტის დეკანმა ქლბ. ნია ბრეგვაძემ გახსნა. პირველი ორი ლექცია შემდეგ საკითხებს მოიცავდა: „უმთავრესი საფეხურები ა.შ.შ-ს რეზიდენტურაში მოსახვედრად“ და „ ქირურგიის საფუძვლები - ასეპტიკა/სტერილობა“. ლექციას უძღვებოდა SIGA-ს დამფუძნებელი, დტსუ-ს მე-5 კურსის სტუდენტი ალექსანდრე ასათიანი. შეხვედრის სალექციო ნაწილის დასრულების შემდეგ დამსწრე აუდიტორია ტრენერებმა სხვადასხვა ჯგუფებში გადაანაწილეს. ჯგუფებს მიეცათ შესაძლებლობა გაევლოთ ტრენინგი ქირურგიის საბაზისო უნარ-ჩვევებში.