21 ივლისს „რესპუბლიკაში“ გაიმართა დავით ტვილდიანის სამედიცინო უნივერსიტეტის 30 წლის იუბილე და 2019 წლის გამოსაშვები საღამო.
საღამოს უძღვებოდნენ ცნობილი პიანისტი დავით ალადაშვილი და ცნობილი საოპერო მომღერალი ნატალია ქუთათელაძე. კურსდამთავრებულებს საქართველოს პრეზიდენტმა ქლბ-მა სალომე ზურაბიშვილმა, უნივერსიტეტის დამფუძნებელმა ბნ-მა დიმიტრი ტვილდიანმა, რექტორმა ბნ-მა ლევან ტვილდიანმა და დეკანმა ქლბ. ნინო ბრეგვაძე-თაბაგარმა მიმართეს. ასევე სიტყვით გამოვიდნენ და დამსწრე საზოგადოებას თავისი გამოცდილება გაუზიარეს დტსუ-ს 2002 წლის გამოშვების სტუდენტმა ვასილ ცისკარიშვილმა და 2019 წლის დამამთავრებელი კურსის სტუდენტმა ლაშა შერაზადიშვილმა.
ტრადიციულად გამოვლინდა მე-6 კურსის საუკეთესო სტუდენტი, რომელიც წელს გახდა ქეთევან გვაზავა. უნივერსიტეტის რექტორმა მას დავით ტვილდიანის სახელობის ჯილდო და ფულადი პრიზი გადასცა. დტსუ-ს დამამთვარებელი კურსის სტუდენტებმა მინდია ტარიელაძემ და ალოჩა ჰენრი ელოჩუკვუმ „ჰიპოკრატეს ფიცი“ წარმოთქვეს. ფიცი დასტურია იმისა, რომ დავით ტვილდიანის სამედიცინო უნივერისტეტის სტუდენტები აცნობიერებენ საკუთარ პასუხისმგებლობას, არასოდეს დაივიწყებენ მას და მუდამ იზრუნებენ პაციენტის ჯანმრთელობაზე, რადგან სწორედ მათი პროფესია უკავშირდება ადამიანის სიცოცხლის გადარჩენას.
იუბილეზე უნივერსიტეტის რექტორმა დამსახურებული ღვაწლისა და ერთგულებისთვის დააჯილდოვა უნივერსიტეტის უხუცესი თანამშრომლები:
• ვიცე-რექტორი სტრატეგიული მართვისა და განვითარების დარგში პროფ. სერგო თაბაგარი
• ვიცე რექტორი სასწავლო დარგში - პროფ. მალხაზ კოკიჩაშვილი
• უნივერსიტეტის კანცლერი - ბნ. ნიკოლოზ გოგუაძე
• სასწავლო დეპარტამენტის ინსპექტორი - ქლბ. კესო ფურელიანი
2019 წლის გამოშვების სტუდენტებმა ასევე დაასახელეს მათი აზრით საუკეთესო მენტორი სწავლების 6 წლის განმავლობაში. აღნიშნული ჯილდო სტუდენტებმა პროფ. მალხაზ კოკიჩაშვილს გადასცეს.
გამოსაშვებ საღამოზე დავით ტვილდიანის სამედიცინო უნივერსიტეტის ცენტრალური სამეცნიერო კვლევითი ლაბორატორიის ხელმძღვანელმა, ქლბ ქეთევან ჯანაშიამ სერტიფიკატებითა და სამახსოვრო პრიზებით დააჯილდოვა ამავე ლაბორატორიის მიერ ჩატარებული ტესტის, „რეაქციის დრო“-ს გამარჯვებულები: მარიამ სილაგავა, თორნიკე ჯაში, სანდრო მუშკუდიანი და ლუკა ჩიგოგიძე .
ტრადიციულად წელსაც დავით ტვილდიანის სამედიცინო უნივერსიტეტმა ლექტორთა 2 ნომინაცია წარადგინა, გამარჯვებულები სერტიფიკატებით და უნივერსიტეტის გულსამაგრებით დააჯილდოვდნენ. ნომინაციაში „2019 წლის გამოსაშვები კურსის რჩეული ლექტორი სწავლების ბაზისური ნაწილიდან“ გახდა ბნ. ვახტანგ მეუნარგია. ხოლო „ 2019 წლის გამოსაშვები კურსის რჩეული ლექტორი სწავლების კლინიკური ნაწილიდან“ გახდა ბნ. გიორგი კენჭაძე.
ცერემონიალის დასასრულს კი სტუდენტებმა ჰიმნი (Gaudeamus Igitur) შეასრულეს.
ცერემონიალის ოფიციალური ნაწილის დასრულების შემდგომ, სტუმრების განწყობაზე თბილისის ბიგ-ბენდმა იზრუნა
დავით ტვილდიანის სამედიცინო უნივერსიტეტი 2019 წლის კურსდამთავრებულებს წარმატებას და კარიერულ წინსვლას უსურვებს.